رحمتہ للعالمین محمد صلی اللہ علیہ وسلم سے محبت کے تقاضے

 

آج دنیا میں جب دین اسلام مغلوب ہے یعنی اللہ کے احکامات کی مکمل طور پر پامالی ہو رہی ہے اور ہم ایمان کے دعویداروں کی اکثریت اس سے لاتعلق ہی نہیں بلکہ کفر اور شرک کے نظام میں مادی آسائشوں کے حصول اور اس نظام میں پھلنے پھولنے میں مگن ہیں تو پھر ہمارا اللہ اور اس کے رسول سے محبت کا دعوٰی صرف جھوٹ اور دھوکہ ہے اور یہ دھوکہ ہم اللہ سبحانہ و تعالٰی کو تو دے نہیں سکتے اسلئے اس کو صرف ہم اپنے آپ کو دھوکہ دینا ہی کہہ سکتے ہیں۔ اور اس میں حیرت انگیز بات یہ ہے کہ ان کوتاہیوں کے باوجود ہمیں اللہ اور اسکے رسول سے محبت کا دعوٰی کرتے ہوئے کوئی شرم اور خوف بھی محسوس نہیں ہوتا۔

بےشک دنیا میں ایسے لوگوں کی ہر زمانے میں موجودگی کا اعلان اللہ سسبحانہ و تعالٰی نے واضح طور پر کیا ہے اور ان ہی کو کامیابی کی نوید دی گئی ہے جن کے دلوں میں حقیقی معنوں میں اللہ اور اس کے رسول کی اطاعت کا جذبہ ہوتا ہے جو ان سے محبت اور عقیدت کا اظہار کرتا ہے۔

 حالیہ دور میں مفکر قرآن علامہ اقبال کی مثال ہمارے سامنے ہیں جنہوں نے امت مسلمہ کو احیاء اسلام کا بھولا ہوا سبق یاد دلایا ہے اور اس کی بدولت آج دنیا بھر میں پھر سے اہل ایمان اپنے مقصد تخلیق کی جانب متوجہ ہو رہے ہیں ان کے دل میں اللہ او4 اس کے رسول کے رسول کی محبت اور عقیدت کا اظہار ان کے کلام سے ظاہر ہوتا ہے

عشقِ رسول اقبال کی رگ رگ میں سرایت تھا۔ جہاں بھی ہوتے مدح رسول سے خود کو قوت وتوانائی بخشتے، 

 اور حقیقت یہی ہے کہ اقبال کا کلام سر سے پا تک عشق رسول کا ہی نتیجہ ہے۔ عاشق چاہے جیسا بھی ہو وہ کبھی بھی اپنے معشوق کے سامنے شرمندگی برداشت نہیں کرسکتا۔ 

علامہ اقبال خدا سے التجا کرتے ہیں کہ اے اﷲ روزمحشر مجھے میرے محبوب کے سامنے شرمندہ نہ کرنا۔ اس کے لیے علامہ کا فارسی کا ایک شعر ملاحظہ ہو  

"تو غنی از ہر دو عالم من فقیر

روزِ محشر عذر ہائے من پذیر

یا اگر بینی حسابم ناگزیر

از نگاہ مصطفےٰ پنہا بگیر"

    'اے خدا تو دونوں جہاں سے بے نیاز ہے اور میں فقیرومحتاج ہوں۔ تیری بے نیازی کا تقاضا تو یہ ہے کہ محشر کے دن میرے عذر قبول فرما۔ اور اگر میرا حساب لینا ضروری ہے تو (میرے محبوب) محمد مصطفی کی نظروں سے پوشیدہ لینا۔ تاکہ میرے محبوب کے سامنے مجھے شرمندہ نہ ہونا پڑے'

اس لیے ہمیں آج اپنا جائزہ لینے کی ضرورت ہے تاکہ ہم اس بات کا تعین کر سکیں کہ کیا ہم واقعی عاشق رسول ہیں اور اس دعوے کو عملی جامہ پہنانے کیلئےہمارا کیا لائحہ عمل ہونا چاہیے۔

یہ سارا لائحۂ عمل سُنّت ِ رسول ﷺکی شکل میں ہمیشہ کے لیے ہماری رہنمائی کا ذریعہ ہے ۔اس عمل کے بنیادی اجزاء یہ ہیں :

  دعوت ِاسلام بذریعہ قرآن

   حزبُ اللہ (اللہ کی جماعت) کی تلاش اور اس کا حصہ بننا 

  نظامِ باطل کے خلاف اقامت ِدین کی جدّوجُہد

اللہ کے دین کے نفاذ کی جدوجہد کر کے ہم اپنی ہی عاقبت کو سنواریں گے‘ کسی پر احسان نہیں کریں گے۔ قیامت کے روز ہر مسلمان کو اس کے حالات‘معاملات اور وسائل و صلاحیتوں کے پیمانے پر پرکھا جائے گا ‘جو کہ عین عدل ہے۔ اللہ تعالیٰ ہمیں دین اسلام کے نفاذ کی جدّوجُہد میں اپنا کردار ادا کرنے کی توفیق‘ طاقت اور ہمت عطا فرمائے تاکہ ہم اپنے رحمتہ للعالمین سے محبت کے تقاضے پورے کر سکیں۔آمین!